LU NANNU A SO’ NIPUTI
di Liborio Palmeri e Baldo Palermo
Figghiu di lu me figghiu,
N’ta li vrazza ti pigghiu,
N’ta ll’occhi ti talìu
E sta Terra ti ci vìu:
Terra di suli m’pastata,
Terra di mari allitata,
D’ogni ciuri ciurusa,
Di ciauru sbampusa;
Cannizzi di furmentu,
Vinu di lu parmentu,
L’ogghiu n’ta li cafisi,
L’agghi ‘ntrizzati tisi.
Terra di li scarsizzi,
Terra di li ricchizzi,
Terra tutta d’amuri,
Terra di lu duluri.
Siti di canuscenza,
Acqua di la pacenza,
Lava sutta la sciara,
Focu di la lupara.
Figghiceddu amatu,
Arma di lu me ciatu,
Terra di risu e chiantu.
Portu di li Fenici,
tiatru di li Greci,
forza di li Latini,
Firi di Bizantini.
Di l’Arabi l’ingegnu,
Di li Normanni u’ regnu,
Svevi Francisi e Spagna:
Canciaru li carcagna.
E dopu li Burbuna
Canciaru li patruna,
Canciaru li clienti
Pi nun canciari nenti.
Tempiu di li pagani,
Chiesa di li cristiani,
a teniri l’amuri
cià statu lu Signuri.
Ciatu di l’arma mia
Senti sta vuci, a tia,
dopu venniri santu
torna sempri lu cantu,
Passannu la Passioni
C’è la Risurrezioni ,
E doppu l’annacata
Ti fazzu na cantata,
E sta cantata sia
Festa pi tia e pi’ mia,
Cu sta cantata avanti:
Festa pi tutti quanti!
Nessun commento:
Posta un commento